Skip to content

Кичево: Околу 3.000 пациенти со дијабетес тип 2, а 900 луѓе на инсулин

1 мин. читање
Сподели
Кичево: Околу 3.000 пациенти со дијабетес тип 2, а 900 луѓе на инсулин
Фото

Фото: Towfiqu barbhuiya Pexels, Pexels License

Во Општина Кичево, според податоците од „Мој термин“ и Центарот за јавно здравје – Битола, во 2025 година се евидентирани приближно 3.000 пациенти со дијабетес тип 2. Околу 900 луѓе се на инсулинска терапија. Ноември е месецот на борбата против дијабетесот, но за нив борбата трае секој ден.

„Дел од нив ја контролираат болеста со диетален режим на исхрана, дел користат лекови, а дел примаат инсулинска терапија“, објаснува Тања Илијоска од Центарот за дијабетес, кој работи во рамките на Интерното одделение во Кичево.

Болеста не ги заобиколува ни најмладите. Меѓу пациентите има околу 10 деца помлади од 18 години со дијабетес тип 1 и околу 10 бремени жени со гестациски дијабетес. Децата, сепак, редовните контроли не ги прават дома, туку на Детската клиника во Скопје.

За да се поттикнат превентивните прегледи, на 24 ноември, во претпладневните часови, пред објектот на Интерното одделение во Кичево ќе има бесплатно мерење на шеќерот во крвта за сите заинтересирани граѓани. Бесплатното мерење е добредојдено. Но зошто децата од Кичево за редовните контроли мора да патуваат до Скопје – тоа е прашање кое не се решава со еден ден посветен на свеста.