Derisa Shkupi gjatë natës blinte shishe ujë për shkak të një mesazhi të rremë, në Kumanovë në Repartin infektiv çdo ditë kontrollohen mbi njëqind pacientë. Kjo nuk është dezinformatë dhe nuk kërkon konferencë për shtyp - është numër që zgjat dy muaj.

Në Spitalin e Përgjithshëm në Kumanovë në atë periudhë është shënuar numër i shtuar i gastroenterokoliteve dhe infeksioneve tjera të zorrëve. Udhëheqësja e repartit, dr. Valentina Xhartovska, thotë se rritja është veçanërisht e shprehur në periudhën e verës dhe përfshin të gjitha grupet e moshës.

Arsyet janë të përditshme dhe pikërisht për këtë kalojnë lehtë pa u vënë re: temperatura të larta, udhëtime dhe tubime më të shpeshta në grupe më të mëdha. Simptomat më të shpeshta janë të vjella, diarre dhe të përzier, ndërsa te një pjesë e pacientëve edhe temperaturë, dhimbje barku, dhimbje koke, dhimbje muskujsh dhe dehidratim. Pjesa më e madhe e rasteve kalon me pamje klinike të lehtë, pa nevojë për hospitalizim.

Kush është vërtet i ekspozuar

Rreziku i dehidratimit është më i madh te fëmijët e vegjël dhe te personat e moshuar, veçanërisht nëse kanë sëmundje kronike. Rekomandimi është i drejtpërdrejtë: me shfaqjen e simptomave menjëherë plotësohen lëngjet, dhe nëse gjendja keqësohet - mjeku.

Për verën mjekët këshillojnë ushqim të lehtë, ruajtje të rregullt të produkteve, përpunim të mirë termik dhe larje të plotë të pemëve dhe perimeve. Higjiena personale është kyçe, sepse infeksionet e zorrëve më shpesh përcillen përmes rrugës fekale-orale, ndërsa një pjesë e viruseve, midis tyre edhe norovirusët, përhapen edhe midis njerëzve.

I njëjti numër, dy shtete të ndryshme

Edhe në Shkup numri i pacientëve me shqetësime stomaku është shtuar. Drejtori i Klinikës për sëmundje infektive, dr. Fadil Cana, tha shprehimisht se klinika nuk ka të dhëna se ndonjëri ka çrregullime gastrointestinale për shkak të ujit të pijshëm. „Për tani ka numër normalisht të shtuar, duke marrë parasysh këtë vapë. Numri është i shtuar, por nuk është mbi normalen në krahasim me vitet e mëparshme.”

Ato deklarata Cana i dha pas konferencës për shtyp në Ministrinë e shëndetësisë - e cila, në fakt, u thirr për gjendjen me ethet e Nilit Perëndimor në shtet.

Dhe këtu është diçka që vlen të shënohet. Dje i gjithë shteti bisedonte për një bakterie që në ujë nuk kishte. Të njëjtën ditë, në konferencë zyrtare për shtyp, njoftohej për sëmundje që ekziston - dhe për repart në Kumanovë që dy muaj pranon mbi njëqind njerëz në ditë. Nga kjo asgjë nuk u përhap nëpër rrjete.

Paniku udhëton më shpejt nga e dhëna. Kjo nuk është e re. E re do të ishte kur numri nga Kumanova të merrte edhe një të dhjetën e vëmendjes që e mori mesazhi nga mesnata.