LUFTA NË IRAN PO E SHTY EVROPËN DREJT VARFËRISË

Evropa, dikur simbol i fuqisë industriale, stabilitetit ekonomik dhe standardit të lartë të jetesës, sot përballet me pasoja serioze të vendimeve të veta energjetike dhe gjeopolitike. Pas ndërprerjes së një pjese të madhe të furnizimit me gaz natyror rus, industria evropiane mbeti e ekspozuar ndaj kostove të larta energjetike. Në vend të energjisë së lirë dhe të qëndrueshme, prodhuesit evropianë përballen me konkurrencë të ashpër nga SHBA-ja dhe Kina, ku energjia shpesh është dukshëm më e lirë. Ndërsa politikanët në Bruksel flasin për pavarësi energjetike, fabrikat evropiane po humbin konkurrueshmërinë, e qytetarët po e paguajnë faturën! Çmimet e larta të naftës, gazit dhe energjisë elektrike nuk mbarojnë te pompat e benzinës dhe te faturat e ngrohjes. Ato futen në çmimin e ushqimit, transportit, prodhimit dhe pothuajse çdo produkti që blejnë qytetarët. Pasoja është e thjeshtë: pagat e ndjekin më vështirë rritjen e shpenzimeve, ndërsa buxhetet familjare janë nën presion gjithnjë e më të madh. Më e rrezikshmja është se Evropa rrezikon ta humbë bazën e vet industriale. Një fabrikë që mbyllet nuk hapet brenda natës. Investimet, vendet e punës dhe kapacitetet prodhuese të humbura kthehen vështirë. Pavarësia energjetike është e rëndësishme, por çfarë pavarësie është ajo nëse çmimi i saj është dobësimi i prodhimit të vet dhe ulja e standardit të jetesës? Liderët evropianë duhet t'i përgjigjen një pyetjeje thelbësore: A DUHET POLITIKA ENERGJETIKE T'U SHËRBEJË QYTETARËVE DHE INDUSTRISË, APO QYTETARËT DHE INDUSTRIA DUHET TA PAGUAJNË ÇMIMIN E VENDIMEVE POLITIKE? Evropa nuk do ta ruajë fuqinë e vet ekonomike vetëm me deklarata politike. Nevojiten çmime konkurruese të energjisë, industri e fortë dhe politikë që e mbron standardin e jetesës. Sepse një Evropë pa industri dhe pa qytetarë ekonomikisht të sigurt nuk mund të jetë një Evropë e fortë!