Албанија официјално стана корисник на противтенковскиот ракетен систем „Џавелин“, еден од најсофистицираните одбранбени системи што ги користат земјите-членки на НАТО. Испораката е реализирана во рамки на стратешката воена соработка со Соединетите Американски Држави.

Министерот за одбрана Пиро Венгу, при посетата на воена база каде што пристигна првата пратка, истакна дека станува збор за значаен чекор во модернизацијата на албанските вооружени сили, јакнењето на националната безбедност и зголемувањето на интероперабилноста со НАТО.

Според Венгу, ова е реализација на долгогодишно барање за набавка на современа противтенковска опрема од највисоки стандарди. Испораката е дел од планиран процес, а втората фаза се очекува во текот на 2026 година.

Тој нагласи дека билатералната соработка со САД има пошироко регионално значење, бидејќи ги опфаќа и Албанија и Косово, што, како што рече, претставува важен фактор за стабилноста и безбедноста на Западен Балкан.

Системот „Џавелин“ е набавен преку механизмот за продажба на странска воена опрема (FMS) и важи за еден од најефикасните противтенковски системи во светот. Произведен во САД, тој овозможува прецизно уништување на оклопни возила и се користи и во реални борбени операции од страна на НАТО-армиите.