Пациентите со дијабетес во Македонија со месеци се соочуваат со сериозен недостиг на лекови, инсулин, тест-ленти и сензори за глукоза. Состојбата е алармантна, а хроничните болни се принудени сами да купуваат терапија или да делат ресурси.

Претседателот на Сојузот на здруженија за дијабетес, Диме Велев, предупреди дека ситуацијата трае веќе неколку месеци и ги погодува особено пациентите со дијабетес тип 1, кои се целосно зависни од инсулинска терапија. „Немаме доволно терапија за дијабетичарите. Сензорите се достапни во ограничени количини, често само за еден месец”, изјави Велев.

Најпогодени се помалите градови – Радовиш, Кочани и Ресен – каде недостигот на специјализиран медицински кадар дополнително ја влошува состојбата. Велев укажа дека недостигаат и медицински сестри за едукација на пациентите, што е критично за правилно управување со болеста.

Без редовна терапија и следење, пациентите се изложени на ризик од хипогликемија, гангрена, слепило и други хронични компликации. Дел од нив се принудени да набавуваат лекови на приватниот пазар, што за многумина е финансиски неодржливо.

Фондот за здравствено осигурување најави нов модел за обезбедување терапија и медицински помагала, со подобрени механизми за снабдување и јасни критериуми за добивање опрема. Здруженијата на пациенти бараат итно спроведување на овие мерки за да се спречи понатамошно влошување на здравствените исходи.