Владата на Хрватска официјално донесе одлука за набавка на голем пакет современа воена опрема, вреден речиси две милијарди евра, што претставува една од најголемите инвестиции во модернизацијата на хрватските вооружени сили досега.

Пакетот вклучува набавка на:

• 18 француски хаубици „Цезар“,

• 44 тенка „Леопард“ 2А8,

• 420 тешки теренски камиони ТАТРА,

• системи за противдронска заштита.

Заменик-претседателот на Владата и министер за одбрана, Иван Анушиќ, изјави дека дел од оваа опрема веќе постои во вооружените сили, но нејзиниот ресурс е при крај и потребно е целосно обновување.

„Целта е да се направи целосен премин од источна кон западна технологија“, истакна Анушиќ, додавајќи дека опремата ќе пристигне до крајот на 2030 година.

Министерот ги прокоментира и критиките од претседателот Зоран Милановиќ, кој претходно тврдеше дека тенковите се прескапи и ранливи. Анушиќ возврати дека „Леопард 2А8“ е најмодерен тенк во светот, кој штотуку излегува од прототип фаза и е единствениот што располага со интегриран систем за противдронска и противоклопна заштита Trophy.

„Постојат причини зошто е скап. Моментално е најдобриот тенк што може да се купи на пазарот“, рече тој.

Обуките за новата техника ќе се одвиваат во Хрватска, а Анушиќ нагласи дека домашната воена индустрија ќе има значителна корист од овој договор, бидејќи хрватските компании веќе склучуваат крупни меѓународни аранжмани.