Хрватскиот вицепремиер и министер за одбрана Иван Анушиќ изјави дека Хрватска нема да даде зелено светло за европските интеграции на Србија сè додека не се реши прашањето за исчезнатите лица од војната, пренесуваат српските медиуми.

„Прашањето за исчезнатите и прашањето за влезот на Србија во Европската унија се две поврзани работи. Не може една земја да има нерешени билатерални прашања со друга, а таа втора – во овој случај Хрватска – да даде зелено светло за напредок во ЕУ“, порача Анушиќ.

Тој нагласи дека токму исчезнатите лица претставуваат „прво и најважно прашање“ во односите меѓу двете земји.

„Очекуваме Србија да ја исполни својата обврска“, додаде хрватскиот министер, потенцирајќи дека без конкретен напредок, хрватската поддршка за европскиот пат на Србија нема да биде можен чекор.