Инфлацијата во Соединетите Американски Држави скокна на 3,3 отсто на годишно ниво во март, што претставува највисока стапка во последните речиси две години. На месечно ниво, цените пораснаа за 0,9 отсто, при што најголем удар претрпе цената на бензинот.

Главен двигател на инфлацискиот скок е конфликтот со Иран и нарушувањата на поморскиот сообраќај низ Хормушкиот Теснец, преку кој минува околу една петтина од глобалната трговија со нафта и природен гас. И покрај најавеното примирје, бројот на бродови кои минуваат низ теснецот остана драстично намален – само 15 наспроти вообичаените 138.

Бензинот забележа скок од 21,2 отсто за еден месец, што претставува најголем месечен пораст откако Бирото за трудова статистика почнало да го следи овој податок во 1967 година. Растот на цените на горивата се прелева и врз другите сектори – авионските билети, облеката и трошоците за домаќинствата веќе бележат зголемување.

Основната инфлација, без храна и енергија, пораснала умерено за 0,2 отсто на месечно ниво, што покажува дека ценовниот шок сеуште не се проширил целосно врз поширокиот потрошувачки кошник. Сепак, аналитичарите предупредуваат дека поскапиот дизел, транспортот и ѓубривата набргу може да извршат притисок врз цените на храната и услугите.

Федералните резерви се наоѓаат пред тешка одлука – дали да ги задржат високите каматни стапки за борба против инфлацијата или да ризикуваат со незадоволство кај потрошувачите поради постојано високите цени. Експертите оценуваат дека доколку геополитичката нестабилност продолжи, инфлацискиот тренд може дополнително да се заостри.