Иран сè побрзо се наметнува како нова глобална сила, а воениот конфликт на Блискиот Исток дополнително го забрзува овој процес, оценува американскиот деловен весник Вол стрит џурнал.

Доколку досега светот функционираше преку три главни центри на моќ – Соединетите Американски Држави, Кина и Русија – сега и Иран сè посериозно се позиционира како четвртата глобална сила.

Клучниот извор на ова зајакнување е Ормускиот теснец, еден од најважните морски правци за транспорт на светската нафта. Контролата над овој теснец му дава на Техеран политичка и економска тежина која далеку ги надминува регионалните граници.

Проблемот не е само во количината на енергенси што минуваат низ Ормускиот теснец, туку и во стабилноста на испораките. Секоја закана за прекин на овој тек предизвикува раст на трошоците за осигурување, поскапување на транспортот и нервоза на светските пазари.

Колку се промениле односите на силите покажува и фактот дека францускиот претседател Емануел Макрон веќе призна дека отворањето на Ормускиот теснец со сила не е реално решение. Прашањето на пловидбата низ овој стратешки правец може да се реши исклучиво во соработка со Иран, што практично значи дека Техеран добива статус на сила со која мора да се преговара.