Луѓето можат да го пренесат вирусот на грип уште пред да се појават првите симптоми, што е една од главните причини зошто во овој период има сè повеќе заболени – особено меѓу децата. Бидејќи грипот е вирусна, а не бактериска инфекција, лекарите апелираат родителите да не даваат антибиотици на своја рака, туку навреме да побараат стручна помош.

Според податоците на Институтот за јавно здравје, сезоната на грип е во полн ек и се очекува пикот на заразата во наредните недели. Зимскиот период, престојот во затворени простории и пореткото проветрување придонесуваат вирусите полесно да се шират.

Како децата се заразуваат со грип?

Грипот најчесто се пренесува во градинките и училиштата – преку кашлање, кивање или близок контакт меѓу децата. Дополнително, вирусот може кратко време да преживее и на површини како играчки, телефони, таблети, брави и маси.

Детето може да се зарази ако допре површина на која има вирус, а потоа ги допре устата, носот или очите. Особено проблематично е што заразените лица можат да го шират вирусот и пред да станат свесни дека се болни.

Кои се најчестите симптоми на грип кај деца?

Грипот е респираторна болест, но често ги зафаќа и другите системи во телото. Родителите треба да обрнат внимание на следните симптоми:

• висока температура (понекогаш и до 40 °C)

• болки во мускулите и зглобовите

• главоболка

• болка во грлото

• сува и упорна кашлица

• изразен замор

• течење или затнат нос

Кај некои деца може да се појават и:

• гадење

• повраќање

• дијареја

Вообичаено, децата закрепнуваат за околу една недела, но чувството на замор може да трае и неколку недели по исчезнувањето на другите симптоми.

Како се лекува грипот кај деца?

При појава на симптоми, најважно е да се консултирате со лекар, кој ќе постави точна дијагноза и ќе препорача соодветна терапија. Грипот не се лекува со антибиотици, бидејќи тие делуваат само на бактерии, а не на вируси.

Антибиотици се даваат исклучиво ако лекарот утврди дека има дополнителна бактериска инфекција, како на пример бактериска пневмонија. Самостојното давање антибиотици може да биде штетно и да доведе до отпорност на лековите.

Лекувањето на грипот најчесто е насочено кон олеснување на симптомите:

• одмор

• внес на доволно течности

• лекови за намалување на температурата, по препорака на лекар

Доколку симптомите не се подобруваат по неколку дена или состојбата на детето се влошува, неопходно е повторно да се побара лекарска помош.