Кафето може да ја „поништи“ користа од витамините и железото: Експертите предупредуваат на сериозен ризик

Луѓето кои редовно земаат додатоци на витамините Б, Ц, Д и железо може несвесно да си ја намалуваат нивната ефикасност доколку ги консумираат заедно со кафе или други напитоци што содржат кофеин, предупредуваат експерти, пренесува британскиот портал „Експрес“.

Според нутриционистката Козловска, кофеинот може значително да ја наруши апсорпцијата на важни витамини и минерали во организмот. Таа советува додатоците во исхраната секогаш да се земаат со обична вода, а внесот на кафе или чај да се одложи најмалку 30 минути.

– Кофеинот може да предизвика губење на есенцијални минерали како магнезиум и калиум, кои се клучни за хидратацијата, здравјето на срцето и нивото на енергија. Додавањето електролити во водата може да помогне во нивната обнова – објаснува експертката.

Особено проблематична е комбинацијата на кафе и додатоци на железо. Железото е една од хранливите материи што телото тешко ги апсорбира во присуство на кофеин, поради што се препорачува да се избегнува кафе или чај неколку часа пред и по земањето вакви суплементи.

Кофеинот негативно влијае и врз апсорпцијата на витаминот Д, кој е неопходен за здрави коски, силен имунолошки систем и квалитетен сон.

– Кофеинот ги попречува рецепторите кои му помагаат на телото да го користи витаминот Д, со што неговиот ефект значително се намалува – предупредува Козловска.

Затоа, експертите апелираат витаминот Д и другите суплементи да се земаат одделно од кафе, со цел организмот максимално да ја искористи нивната корист.