Германскиот канцелар Фридрих Мерц изјави дека постои сериозен сомнеж дека Русија стои зад серијата беспилотни летала забележани над Германија изминатиот викенд, кога беа откажани десетици летови и повеќе од 10.000 патници останаа блокирани на аеродромот во Минхен.

Мерц посочи дека фреквенцијата на вакви инциденти е без преседан, дури и во споредба со Студената војна, и дека сите дронови биле невооружени и користени за извидувачки цели.

Во последните недели, слични неидентификувани дронови се појавиле и над неколку други европски земји. Во Данска, властите пријавиле летови над аеродромот Каруп и други воени објекти, поради што бил воведен привремен мораториум за цивилни дронови и зголемен воениот надзор. Данското разузнавање овие појави ги оцени како „хибридни напади“, обвинувајќи ја Русија за мешање во безбедноста на земјата.

Сомнителни летови на дронови се пријавени и во Белгија, особено над воената база Елзенборн, како и во Германија, каде што инцидентите стануваат сè почести во близина на воени и индустриски зони.

Европските безбедносни служби ја следат ситуацијата, оценувајќи дека дроновите можат да претставуваат дел од поширока стратегија на притисок и шпионажа во рамки на тековните геополитички тензии.