Жителите на Скопје продолжуваат да се соочуваат со чести прекини во водоснабдувањето, а зачестените дефекти на водоводната мрежа ја откриваат слабоста на инфраструктурата која е во критична состојба.

Само во последните месеци, голем број скопски населби останаа без вода поради дефекти на цевководите. Централните делови на градот, вклучувајќи ги улицата „Македонија”, булеварот „Кочо Рацин” и околните населби, повеќепати беа зафатени од ненајавени прекини. Реконструкции на мрежа со мал пречник и менување вентили станаа секојдневие за екипите на ЈП „Водовод и канализација”.

Минатиот месец, поради санација на главниот градски цевковод со пречник од 1.600 милиметри, најголемиот дел од Скопје остана без вода повеќе часови. Работите опфатија замена на нефункционални вентили, поправка на механизми кои пропуштаат и замена на одводи за воздух на потегот од кружниот тек во Ѓорче Петров до крстосницата на булеварот „Партизански одреди” со улицата „Никола Парапунов”.

Од претпријатието тогаш објаснија дека превентивната интервенција е неопходна за да се избегнат подолготрајни прекини какви што имаше во Тетово, Битола и Штип, каде несанираните дефекти предизвикаа повеќедневни прекини во водоснабдувањето.

Проблемот не е нов – дистрибутивната мрежа во одредени урбани делови е застарена и бара постојано присуство на теренските екипи. Дефектите на помалите цевководи се најчести, но и најтешко предвидливи, што значи дека граѓаните често дознаваат за прекинот дури откако ќе останат без вода.

Институтот за јавно здравје повеќепати апелираше до граѓаните да се подготват за можни прекини, советувајќи складирање на најмалку четири литри вода по лице дневно и користење на водата исклучиво за пиење, готвење и хигиена во периодите на прекин.

Стручњаците укажуваат дека е потребно континуирано вложување во водоводната инфраструктура за да се спречат повторувањата на овие проблеми кои директно влијаат на квалитетот на животот на скопјани.