Собранието денес одлучува за предлогот на Владата за избор на судијата Ненад Савески за нов државен јавен обвинител. Седницата е закажана за 11 часот, а за изборот е потребно апсолутно мнозинство – најмалку 61 глас.

Савески моментално е судија во Основниот кривичен суд во Скопје и беше избран од Владата минатиот вторник како кандидат за шеф на Јавното обвинителство. Тој беше меѓу четирите кандидати за кои Советот на јавни обвинители даде позитивно мислење во февруари.

„Одлуката беше донесена по конструктивна дискусија земајќи ги предвид сите аспекти на кандидатите – од професионалното искуство до личниот интегритет”, изјави владината портпаролка Марија Митева по седницата.

Премиерот Христијан Мицкоски изјави дека лично не го познава Савески, но врз основа на неговата биографија и направените проверки, Владата верува дека „тој би можел да биде одличен јавен обвинител”.