Администрацијата на Доналд Трамп ги објави плановите за изградба на голем триумфален лак во Вашингтон, уште еден проект преку кој американскиот претседател сака да остави свој белег врз главниот град на нацијата.

„Со задоволство објавувам дека мојата администрација официјално поднесе презентација и планови до Националната комисија за ликовни уметности за она што ќе биде најдобриот и најубавиот триумфален лак на светот“, напиша републиканецот на својата платформа Truth Social.

Лакот, висок 76 метри, се очекува да стане најголемиот монумент од овој вид во светот. Според плановите, на лакот ќе стојат три златни статуи со натписи со златни букви „Една нација под Бог” и „Слобода и правда за сите”.

Планот е поднесен до Националната комисија за ликовни уметности, чии членови се именувани од самиот Трамп. Инспириран од Триумфалната порта во Париз, новиот проект е меѓу многуте поддржани од претседателот со цел да остави траен впечаток врз американскиот пејзаж.

Трамп исто така изгради огромна сала за танцување во Белата куќа за до 1.000 луѓе, го преименуваше Кенеди центарот во Трамп Кенеди центар и доби одобрение за ковање комеморативна монета со неговиот лик.