Андерфест на 7 ноември во 19 часот во МКЦ во Скопје го приредува второто издание на „Трибјут фест“, вечер во која трибјут-бендови и музичари им оддаваат почит на големите имиња од рокот, попот и алтернативната музика.

Прв објавен изведувач е Оф Деј Гоу, трибјут-бенд за Линкин Парк. Американскиот состав со „Hybrid Theory“ од 2000 година стана еден од најпродаваните бендови на новиот милениум, а песните како „In the End“ и „Numb“ се дел од музичката меморија на цела генерација.

Остатокот од поставата организаторите засега го чуваат. Ден претходно, на 6 ноември, во истата сала е осмиот Андерфест, па за двата дена МКЦ станува мал фестивалски викенд за љубителите на гитарска музика.

Раните билети чинат 700 денари на tix.mk и се во продажба до 15 октомври.