По повод Светскиот ден на мозочниот удар – 29 октомври, Универзитетската клиника за неврологија утре организира отворен ден за граѓаните под мотото „Мозочниот удар се лекува“.

На 28 октомври (вторник), во периодот од 10 до 12 часот, сите заинтересирани граѓани ќе можат бесплатно да направат доплер на каротидни артерии, без упат, во просториите на Клиниката за неврологија.

Настанот има за цел подигнување на свесноста за превенција, рана дијагностика и навремено лекување на ова сериозно заболување.

Од Министерството за здравство порачаа дека со оваа иницијатива се испраќа силна порака за важноста на редовните контроли и проверка на ризик-факторите, како што се висок крвен притисок, шеќер во крвта, зголемени масти, пушење и седечки начин на живот.

„Ги покануваме сите граѓани да го посетат настанот, да се информираат и да ја проверат својата состојба, бидејќи раното откривање е клучно за превенција и спасување на животот,“ соопштија од Клиниката за неврологија.