Српскиот претседател Александар Вучиќ се обрати до нацијата и соопшти дека рафинеријата НИС работи во режим на „топла циркулација“ и има уште четири дена до целосен прекин доколку американскиот OFAC не ја одобри потребната лиценца. Тој нагласи дека, поради Денот на благодарноста во САД, одлуката може да пристигне денес или утре, но ако не биде донесена навреме, рафинеријата ќе запре.

Според Вучиќ, рестартот би траел најмалку 14, а најверојатно 20 дена, што значи дека НИС нема да работи ниту до Нова година. Тој потсети дека Србија успеала да избегне енергетска криза во 2022 година благодарение на одлуките на Советот за национална безбедност, но денес се соочува со далеку посложени притисоци.

Претседателот изјави дека Србија стана цел на „жестоки напади и уцени“, иако, како што рече, не ги предизвикала проблемите. Санкциите, според него, имаат длабоко стратешко влијание и ја ставаат државата во исклучително тешка позиција.

Вучиќ откри дека Народната банка на Србија добила предупредување за можни секундарни санкции, што може да доведе до целосен прекин на трансакциите, картичките и кредитирањето. Тој наведе дека има усни гаранции од САД дека санкции нема да бидат активирани додека трае одлучувањето за лиценцата, но исходот зависи целосно од Вашингтон.

„Последиците ќе ги почувствуваат сите – од здравството до трговските синџири“, порача Вучиќ, додавајќи дека Србија останува транспарентна и ќе ја информира јавноста за секоја промена.