Со години аналитичарите велеа дека електричните автомобили еден ден ќе станат поевтини од бензинските. Предвидувањата најчесто ја посочуваа втората половина на оваа деценија, а BloombergNEF пресвртот го очекуваше токму во 2026 година. Еве го.

Проблемот со споредбата досега беше едноставен: ретко кој електричен модел имаше бензински близнак со кој може фер да се спореди. BMW сега понуди таков пар. Новата Серија 3 за 2027 година доаѓа и на бензин и на струја, а електричната верзија е поевтина.

Бројките од американскиот пазар: бензинскиот M350 xDrive чини 65.900 долари, електричниот i3 50 xDrive 61.500 долари, без трошоците за испорака. Разликата е 4.400 долари, или 6,7 проценти во корист на струјата. Двата модела се слично моќни, слично дизајнирани и наменети за ист купувач.

Педантите ќе забележат дека постои и многу поевтина бензинска Серија 3: моделот 330 чини 49.900 долари, а 330 xDrive 51.900 долари. Само што тие засега немаат електричен пандан. Има и разлика што не се гледа на ценовникот: електричниот i3 е изграден на најновата платформа и технологија на BMW, додека бензинскиот се снаоѓа со преработена верзија на постоечката.

Ни кај дометот нема драма. Бензинската Серија 3 со погон на сите четири тркала најверојатно ќе вози околу 724 километри со полн резервоар, колку и претходните модели. Електричната поминува 753 километри со едно полнење, а според BMW, брзото полнење за 10 минути враќа околу 335 километри. Разликата ќе ја почувствуваат само оние што живеат на автопат.

Досега правилото гласеше: електричниот автомобил е поскап на салон, а поевтин долгорочно. Сега почнува да биде поевтин и на салон. Дали кај нас првото прашање ќе биде цената – или каде да се наполни?