Советот на Град Скопје донесе одлука со која се намалува бројот на предвидените нови вработувања во јавните претпријатија и установи на Градот. Градоначалникот Орце Ѓорѓиевски веднаш ја претстави како пресвртница: „драстично“ помалку нови вработувања.

Приоритет, според Градот, ќе имаат теренските и оперативните места: возачи во ЈСП, работници и возачи во ЈП „Комунална хигиена“ и друг оперативен кадар таму каде што навистина недостига. Административните позиции се сведуваат на минимум.

„Денес, на седницата на Советот на Град Скопје, е донесена одлука со која ставаме крај на децениските лоши практики на неконтролирано натрупување на администрацијата и дополнително оптоварување на градскиот буџет. За првпат досега, во сите јавни претпријатија и установи се предвидуваат помалку нови вработувања. Истовремено, вкупниот број вработени, особено во јавните претпријатија, се намалува по законски основи“, напиша Ѓорѓиевски на Фејсбук.

Насоката звучи разумно. Скопје има потреба од возачи и од луѓе што чистат улици повеќе отколку од уште еден референт. Но во ниту едно од соопштенијата нема бројка. Колку вработувања биле планирани досега, колку се планираат сега, колку луѓе работат во градските претпријатија и колку ќе заминат „по законски основи“? Без тие бројки, „драстично“ е придавка, не податок.

Ако реформата е вистинска, табелата треба да биде јавна. Тогаш скопјани ќе можат сами да пресметаат дали децениското натрупување навистина завршило, или само го сменило името.