Lufta që Moska dëshiron ta mbajë larg qytetarëve të vet u kthye sërish në shtëpi - fjalë për fjalë. Dronët ukrainas goditën rafinerinë më të madhe të naftës në Moskë dhe një depo karburanti në rajonin e Krasnodarit, në një nga goditjet më të thella deri tani. Rafineria ndodhet vetëm 15 kilometra nga Kremlini.

Kryetari i Moskës Sergej Sobjanin njoftoi fillimisht se mbi rajon u rrëzuan mbi 35 dronë rreth orës 5 të mëngjesit, ndërsa më vonë shifra u ngjit në mbi 60. Megjithatë, një pjesë kaloi - rafineria e goditur, në pronësi të Gazprom neft, furnizon rreth 40 për qind të tregut të Moskës me karburant dhe mbulon afër 70 për qind të konsumit rajonal të benzinës. Në rajonin e Krasnodarit, ndërkohë, mbi 500 pika karburanti përballen me mungesa.

Kievi nuk e fshehu se kjo është strategji e qëllimshme. „Armët ukrainase me rreze të gjatë veprimi janë komponent i rëndësishëm i presionit. Kjo është përgjigje e drejtë ndaj sulmeve ruse dhe ndaj zgjatjes së luftës", deklaroi presidenti Zelenski. U përdorën dronë „Luti" - prodhim vendas ukrainas, me rreze veprimi mbi 1.000 kilometra dhe kokë lufte 75 kilogramëshe.

Kur lufta arrin te pika e karburantit e qytetarit të zakonshëm, abstraksioni zhduket. Ballkani e di shumë mirë se në fund çdo luftë matet me radhët para pompës, me rezervuarë bosh dhe me çmime që kërcejnë brenda natës. Sado që Moska e mbante luftën „diku larg", droni nuk lexon propagandë - ai fluturon 500 kilometra dhe ulet aty ku dhemb më shumë.