Vetëm tetë nga 100 gra rome janë të punësuara: Pa rrogën tënde vështirë del edhe nga një shtëpi ku ka dhunë

Vetëm tetë nga njëqind gra rome janë të punësuara. Të dhëna është e Komisionit për Parandalim dhe Mbrojtje nga Diskriminimi, për periudhën nga viti 2022 deri në vitin 2024. 92 të tjerat janë pa punë, dhe për një grua në shtëpi me dhunë kjo nuk është statistikë, por derë që nuk hapet.

Sabina Asanova, kryetare e Shoqatës Rome „Rodop“ nga Shtipi, e përshkruan këtë pa zbukurime: „Një pjesë e madhe e grave që vuajnë dhunë tërhiqen dhe nuk kanë guxim të denoncojnë, sepse nuk kanë mbështetje dhe nuk dinë ku të drejtohen. Ana financiare është problemi i tyre më i madh, po ashtu edhe banimi. Nuk kanë ku të kthehen.“

Kështu mbyllet rrethi. Arsimi i papërfunduar dhe varfëria e vështirësojnë punën, pa punë nuk ka të ardhura të veta, ndërsa pa të ardhura nuk ka dalje nga mjedisi ku gruaja është e ekspozuar ndaj dhunës. Diskriminimin, thonë nga shoqata, e ndiejnë edhe gjatë kërkimit të punës, edhe në institucionet shëndetësore, edhe në sistemin arsimor. Në çdo vend ku do të duhej të merrnin ndihmë.

Psikologia Vesna Trajkovska thekson se përveç ngritjes së vetëdijes, e rëndësishme është mbështetja institucionale dhe joinstitucionale për viktimat, që të mos mbeten vetëm me pasojat e dhunës. Kjo tingëllon e arsyeshme, dhe pikërisht për këtë është e çuditshme që duhet përsëritur.

Asanova u bën thirrje grave të marrin guxim, të denoncojnë, të arsimohen, të punësohen. Mesazh i fortë, por barra sërish bie mbi më të cenueshmet. Pyetja e radhës është për institucionet: sa programe punësimi dhe sa vende strehimi ekzistojnë për këto gra, dhe kush mund t'i përmendë?