Emiratet sërish paguajnë për luftën në Jemen: frika nga Huthët i bashkoi Riadin dhe Abu Dhabin

Emiratet e Bashkuara Arabe, të cilat në janar u tërhoqën nga lufta në Jemen, po kthehen. Sipas britanikut „The Guardian“, që u referohet burimeve jemenase, Abu Dhabi, në marrëveshje me Arabinë Saudite, sërish do t'u paguajë para disa forcave qeveritare që në jug të vendit luftojnë kundër Huthëve. Riadi, në këmbim, është zotuar t'u sigurojë mbështetje ajrore forcave që luftojnë kundër tyre.

Nëse raporti konfirmohet, kjo është shenja e parë konkrete se përçarja e thellë mes Riadit dhe Abu Dhabit për të ardhmen e Jemenit mund të fillojë të mbyllet. Motivi është frika: përparimi i Huthëve nëpër Jemen i shqetësoi sundimtarët e të gjitha shteteve rivale në Gjirin Persik. Arabia Saudite përballet çdo ditë me sulme me dronë e raketa dhe me vështirësi e mban funksionimin normal të vendit, sepse goditjet e Huthëve i paralizojnë aeroportet dhe pjesë të infrastrukturës energjetike.

Forcat në jug, para së gjithash të ashtuquajturat „Brigada të Gjigantëve“, më herët i stërvitnin dhe i financonin Emiratet. Ato konsiderohen si një nga pjesët më efikase të koalicionit përndryshe të përçarë kundër Huthëve. Por kur Abu Dhabi në janar i ndërpreu operacionet në Jemen, bashkë me to e preu edhe financimin.

Grindja që i ndau

Ndarja ishte e ashpër. Lideri i Këshillit Kalimtar Jugor (STC) separatist, Aidarus al-Zubaidi, në janar iku në Abu Dhabi, pas përpjekjes së dështuar të lëvizjes së tij për të marrë kontrollin e jugut dhe për të shpallur referendum për shkëputje brenda dy vitesh. Saudët u përgjigjën duke bombarduar ngarkesa armësh nga Emiratet të destinuara për forcat e STC-së. Emiratet më pas njoftuan se po tërhiqen nga Jemeni, ndërsa qeveria që e mbështet Riadi paralajmëroi se do ta ndjekë Zubaidin për tradhti të lartë. Kontakt i drejtpërdrejtë mes Zubaidit dhe zyrtarëve sauditë nuk ka as sot.

Pyetja e hapur është referendumi. Separatistët e Jemenit jugor këtë javë kërkuan votim për shkëputje, i cili do t'i kthente kufijtë e periudhës mes 1967 dhe 1990, kur Jemeni ishte i ndarë në dy shtete. As Riadi as Abu Dhabi nuk u përgjigjën. Këshilli Kalimtar Jugor për momentin nuk pranon që trupat e tij të luftojnë jashtë kufijve të ish-Jemenit të Jugut, por nëse Riadi e pranon shprehimisht referendumin, ky kufizim ka gjasa të bjerë. Ballkani e di mirë se një referendum për kufij të vjetër rrallë mbetet vetëm kartë negociatash.

Ndërkohë, qeveria e njohur ndërkombëtarisht me seli në Aden javën e kaluar paralajmëroi një kundërofensivë për dëbimin e Huthëve nga kryeqyteti Sana. Për momentin suksesi është i kufizuar - në zonën e Maxhzarit, afër Maribit, dhe pranë ngushticës Bab el-Mandeb. Në letër, marrëveshja e re duket si bashkim kundër një armiku të përbashkët. Testi i vërtetë do të vijë me pyetjen e parë se i kujt do të jetë jugu pasi të tërhiqen Huthët.