Princi Harry 29 vjet më vonë për thirrjen e fundit me Dianën: një djalë dymbëdhjetëvjeçar që nxitonte ta mbyllte telefonin për të luajtur me kushërinjtë

Harry është 42 vjeç, ndërsa pendimi më i madh i jetës së tij është një bisedë që zgjati disa minuta. Fundi i gushtit 1997, Balmoral, një thirrje telefonike. Në anën tjetër është Diana, disa orë para aksidentit në Paris. Ai është një djalë dymbëdhjetëvjeçar që dëshiron ta mbyllë telefonin sa më shpejt.

„Po ta dija se ishte e fundit, biseda do të kishte qenë krejtësisht ndryshe“, thotë princi në një intervistë për revistën GQ, të dhënë gjatë qëndrimit të tij të fundit në Nju Jork. Dhe shton, pa zbukurime: „Isha një fëmijë dymbëdhjetëvjeçar që mendonte vetëm si ta mbyllte telefonin dhe të shkonte të luante me kushërinjtë“.

Në intervistë Harry e bën dallimin që e di kushdo që ka humbur një njeri të afërt: sëmundja të lë kohë për t’u përshëndetur, humbja e papritur nuk të lë asgjë. Tema nuk është abstrakte për të - babai i tij, mbreti Charles III, kohët e fundit është përballur me kancerin.

Në kujtimet „Spare“, të botuara në janar 2023, Balmorali i verës së vitit 1997 përshkruhet si idil. „Për mua Balmorali nuk pushoi kurrë së qeni, thjesht, Parajsa“, shkruante ai atëherë. Në Balmoral e dëgjoi zërin e nënës për herë të fundit, ndërsa mëngjesin tjetër mësoi se ajo nuk ishte më.

Sot Harry e kthen pikëllimin në punë. Po përgatit një kurs për MasterClass për pikëllimin dhe qëndrueshmërinë, së bashku me neuroshkencëtaren Mary-Frances O'Connor. Shtëpia mbretërore me dekada e ktheu pikëllimin në protokoll, ndërsa princi që u largua prej saj po e kthen në leksion. Por dhimbja e djalit që në shtator 1997 ecte pas arkivolit të nënës nëpër Londër ishte e vërtetë, para syve të gjithë botës.

Pjesa më intime e intervistës është edhe më e shkurtra. Harry thotë se vazhdon të flasë me nënën në mendime, t’i bëjë pyetje dhe ndonjëherë ka ndjesinë se merr përgjigje. „Pyes veten si do të ishte familja ime sikur ajo të ishte ende këtu“, thotë ai.

William atëherë ishte 15 vjeç. Sot vëllezërit janë larg pajtimit, ndërsa pyetja e Harryt varet në ajër si para 29 vitesh: a do të dukej ndryshe kjo familje me Dianën brenda saj?