Grindja në trafik përfundoi në mënyrën më të tmerrshme të mundshme. Në Shkup, një drejtues automjeti, pas një përplasjeje paraprake, qëllimisht goditi një motoçiklist, e më pas vazhdoi ta tërhiqte nëpër rrugë. Në vendngjarje ndërhyri policia, e cila kreu këqyrjen dhe nisi procedurën për të përcaktuar përgjegjësinë e plotë.

Motoçiklisti pësoi lëndime pasi u tërhoq nëpër asfalt nga automjeti në lëvizje. Rëndesa e saktë e lëndimeve ende po vlerësohet, ndërsa policia po punon për të sqaruar të gjitha rrethanat e incidentit.

Ky nuk është një aksident „i zakonshëm" trafiku - dallimi mes një aksidenti dhe një sulmi qëndron te një fjali e vetme: drejtuesi goditi qëllimisht. Kur makina nga mjet transporti shndërrohet në armë për shkak të nervozizmit në rrugë, kjo nuk është më çështje kulture trafiku, por sigurie e të gjithëve që ndajnë të njëjtën rrugë.

Sa herë duhet që një grindje te semafori të përfundojë me gjak që të kuptojmë se agresioni pas timonit nuk është burrëri, por kërcënim? Policia tani po mbledh faktet, por çështja e dënimit është ajo që do të tregojë nëse një sjellje e tillë ka pasoja - apo sërish gjithçka do të reduktohet në një „incident" që harrohet shpejt.