Ndonjëherë ngjyra e një fustani thotë më shumë se të gjitha deklaratat e dashurisë. Gjashtë vjet më parë, pikërisht më 24 qershor, Nikola Pelc festoi fejesën e saj me Bruklin Bekam me një fustan mëndafshi të verdhë - një ngjyrë që tradita e konsideron të pafat. Sot, kur mbushen gjashtë vjet nga ajo fejesë, ai detaj tingëllon gati si një parashikim.

Fustani mbante firmën e Viktoria Bekam, nga koleksioni i saj pranverë-verë 2020 - midi, prerje asimetrike, dekolte e thellë në formë V-je, me palosje dhe volane. Zgjedhja nuk ishte e zakonshme. Një vjershë e vjetër viktoriane për nuset thotë: „E martuar me të verdhë, e turpëruar nga burri", duke sugjeruar se ngjyra sjell fat të keq. Edhe në teatrin spanjoll e në korrida, e verdha gjithmonë ka mbartur një konotacion negativ.

Atëherë gjithçka dukej përrallore. Bruklin shkroi në rrjetet sociale: „Dy javë më parë i kërkova shpirtit tim binjak të martohej me mua dhe ajo tha po." Unaza - një diamant në prerje smeraldi me vlerë mbi 280.000 euro. Pasuan një dasmë në Florida në vitin 2022 me 500 të ftuar dhe një fustan haute couture nga Valentino, ndërsa në vitin 2025 edhe një ceremoni intime e ripërtëritjes së betimeve.

Por pikërisht në atë ceremoni të dytë u shfaq plasaritja - Dejvid dhe Viktoria Bekam nuk ishin mes të ftuarve. Që atëherë shkruhet se Bruklin i ndërpreu lidhjet familjare, duke pretenduar se prindërit u përpoqën t'ia „shkatërronin" lidhjen. Nëse fustani i verdhë vërtet solli fatkeqësi, apo thjesht dy familje nuk gjetën gjuhë të përbashkët, mbetet pyetje për ata që besojnë në shenja.

Besëtytnitë rreth dasmave ka në mbarë Ballkanin po aq sa në Angli - edhe te ne kihet kujdes për ngjyrën, për ditën, për atë se kush hyn i pari. Tregimi i Nikolës dhe Bruklinit nuk dëshmon se e verdha është e mallkuar; dëshmon diçka më të zakonshme - se as dasma më e shtrenjtë nuk e garanton paqen nëse pas saj qëndron një familje në luftë.