Propagandisti i Putinit i ofron Trumpit: „Ta ndajmë Evropën vëllazërisht, si në vitin 1814“

Vladimir Solovjov, një nga zëdhënësit më të zëshëm propagandistikë të Kremlinit dhe lajmëtar i palodhur i politikës së Vladimir Putinit, doli në emisionin e tij në televizionin shtetëror rus me një propozim: koalicion ushtarak midis Rusisë dhe SHBA-së, që do ta ndante Evropën pa ia kërkuar mendimin Bashkimit Evropian.

„Pse të mos krijojmë një koalicion ushtarak të Rusisë dhe Amerikës dhe ta ndajmë Evropën“, pyeti Solovjov para shikuesve. Sipas tij, me ushtritë e dy fuqive të stacionuara në kontinent, Evropa „më në fund do të ishte e sigurt“. „Le të fusim trupa ruse dhe amerikane dhe Evropa nuk do të ketë më nevojë të mbrohet nga askush. Në heshtje dhe me kujdes do t’i vendosim bazat tona në vendet e zakonshme, në Berlin dhe Paris, si në vitin 1814“, tha ai, duke menduar për hyrjen e ushtrisë ruse në Paris pas fitores ndaj Napoleonit.

Duke iu drejtuar drejtpërdrejt Trumpit, Solovjov porositi: „Ta ndajmë Evropën vëllazërisht.“ Oferta erdhi në paketë: Rusia ta ruajë dominimin në tregun energjetik evropian, ndërsa SHBA-ja si kompensim ta marrë Grenlandën.

Do të thuash - cirk televiziv. Ndoshta. Por Solovjov nuk flet në kafene, por në televizionin shtetëror të një vendi që për të pestin vit bën luftë në Ukrainë. Dhe Ballkani këtë retorikë e njeh nga dora e parë: në vitin 1944 Churchilli dhe Stalini në një copë letër i ndanë sferat e ndikimit në Evropën Juglindore në përqindje, ndërsa Jugosllavinë e përgjysmuan - 50 me 50. Kur të mëdhenjtë fillojnë të ndajnë „vëllazërisht“, të vegjlit zakonisht as që pyeten. A mendon seriozisht Evropa se ky është vetëm shou?