Sri Lanka: ishulli ku tempulli, xhamia dhe kisha janë në minuta largësi

Ishulli në formë loti në Oqeanin Indian - Sri Lanka - është një nga ato vende ku në të njëjtin qytet mund të kalosh për disa minuta pranë një tempulli budist, një tempulli hindu, një xhamie dhe një kishe. Ai diversitet fetar, pa tensione dhe pa mure mes njerëzve, është gjëja e parë që habit këdo që vjen me pritjen për „ekzotikë".

Hyrja është përmes Kolombos, kryeqytetit, ku arkitektura koloniale përzihet me ndërtesa moderne si kulla Lotus, kulla më e lartë në Azinë Jugore. Që andej rruga të çon te Kandi, kryeqyteti shpirtëror, ku tempulli Sri Dalada Maligava ruan një relikë të shenjtë - një dhëmb të Budës, aq i rëndësishëm përgjatë historisë sa ruajtësi i tij njihej si sundimtari legjitim i ishullit.

Zemra e udhëtimit është i ashtuquajturi Trekëndëshi Kulturor, me pesë nga tetë lokalitetet nën mbrojtjen e UNESCO-s. Aty është Sigirija, Shkëmbi i Luanit - 1.231 shkallë që ngjiten përgjatë një muri graniti ku princi Kasapa ndërtoi një pallat të paarritshëm pasi vrau të atin. Qytetet arkeologjike Anuradhapura dhe Polonaruva ruajnë tempuj mijëravjeçarë dhe statuja gjigante të Budës.

E ndoshta pjesa më e bukur nuk është asnjë monument i veçantë, por rruga mes tyre. Treni nga Kandi te Ela përshkon peizazhe nga shekulli i nëntëmbëdhjetë, ku gra tamile me saree shumëngjyrëshe e mbledhin çajin me dorë në plantacionet e Cejlonit. Urën me nëntë harqe, mbi njëqind vjet të vjetër, të ndërtuar vetëm prej guri e tulle, vendasit e quajnë „Ura në qiell". Ka vende që shihen, e ka vende që ndihen - Sri Lanka është nga këto të fundit.