Ka mbiemra që hapin dyer, dhe mbiemra që rëndojnë. Maria Izabel Fraga mbante një nga më të rëndët në politikën spanjolle - ishte vajza e Manuel Fragës, themeluesit të partisë që më vonë u rrit në Partinë Popullore të sotme. Dhe pikërisht prandaj rrëfimi i saj befason: në vend të politikës dhe pushtetit, ajo zgjodhi mjekësinë dhe punën e heshtur mes më të varfërve.

Ndërroi jetë papritur në 78 vjeç, jo në një spital me emrin e saj, as në një ngjarje solemne, por në Antananarivo, kryeqytetin e Madagaskarit, ndërsa punonte në një mision humanitar. Shkaku i vdekjes nuk u njoftua menjëherë. Të afërmit e saj dhanë ndoshta epitafin më të sinqertë të mundshëm: „ndërroi jetë aty ku donte të ishte - me të varfrit“.

Ishte mjeke që vitet e fundit iu përkushtua tërësisht punës humanitare dhe kauzave sociale. Nga pesë vëllezër e motra, vetëm motra e saj Karmen ndoqi gjurmët e babait në politikë, si eurodeputete. Maria Izabel zgjodhi rrugën e kundërt - atje ku nuk ka kamera, nuk ka fjalime dhe nuk ka duartrokitje.

Trupi i saj po përgatitet për transferim në Spanjë, ka gjasa në një vend të vogël galisian ku janë varrosur prindërit e saj. Në një botë ku fëmijët e mbiemrave të njohur më së shpeshti luftojnë për trashëgimi dhe publicitet, një grua 78-vjeçare që vdes në punë mes më të varfërve në një kontinent tjetër është një kujtesë se masa e vërtetë e një jete rrallë rri në rubrikën e të famshmëve.