Në fshatin Knezhino të Kërçovës u vendos guri i themelit i një faltoreje të re ortodokse „Shën Gjon Pagëzori" - një ngjarje që për bashkësinë e vogël lokale do të thotë shumë më tepër se ndërtim. Bekimin e themeleve e kreu mitropoliti i Dibrës dhe Kërçovës Georgi, në bashkëmeshim me priftërinj nga parokia e Kërçovës.

Në ceremoni morën pjesë kryetari i Komunës së Kërçovës dr. Aleksandar Jovanovski, deputeti Gjorgjija Sajkoski, si dhe kryetarët e Debarcës dhe Makedonski Brodit. Ndërtimi i faltores, thonë organizatorët, përbën një projekt të rëndësishëm shpirtëror dhe shoqëror për bashkësinë, kurse kisha e re pritet të bëhet vend për shërbesa fetare dhe për ruajtjen e traditës ortodokse.

Në një kohë kur fshatrat nëpër Maqedoni po zbrazen dhe të rinjtë po ikin, projekte të tilla bartin një mesazh të dyfishtë. Nga njëra anë, ndërtimi i një kishe është shenjë se bashkësia ende beson në të ardhmen e saj në atë vend. Nga ana tjetër, është e vështirë të mos pyesësh - a do të marrë fshati përkrah faltores edhe vende pune, rrugë, ambulancë, shkollë; gjërat që i mbajnë njerëzit aty.

Besimi është shtyllë e çdo bashkësie ballkanike dhe askush nuk e kundërshton rëndësinë e tij. Por ngritja shpirtërore dhe mbijetesa e një fshati shkojnë dorë për dore. Knezhino sot mori themel për faltore; mbetet të shihet a do të investojnë institucionet edhe në themelet e tjera - ato që vendosin nëse fare do të ketë kush të shkojë në kishën e re për dhjetë vjet.