Izraeli e ndëshkoi koalicionin e Netanjahut me pjesëmarrjen më të lartë që nga viti 1999: sipas exit poll-eve, çelësi për qeverinë është te partitë arabe

Exit poll-et e para pas zgjedhjeve parlamentare në Izrael tregojnë se blloku opozitar i udhëhequr nga Gadi Eisenkot ka fituar më shumë vende deputetësh se koalicioni i kryeministrit Benjamin Netanjahu. Por asnjëra palë nuk ka shumicë për të formuar qeveri. Për këtë nevojiten 61 nga gjithsej 120 deputetë në Knesset, ndërsa sipas vlerësimeve të para asnjë bllok nuk i mbledh.

Pjesëmarrja ishte më e larta që nga viti 1999 - në votime dolën së paku 77,7 për qind e votuesve. Likudi i Netanjahut mbetet partia më e madhe individuale, ndërsa partitë arabe, sipas projeksioneve, fituan rekord 17 deri në 18 vende. Ato tani mund të vendosin se kush do ta qeverisë Izraelin.

Eisenkot menjëherë deklaroi se nis përpjekjen për ta zëvendësuar Netanjahun. Aleatët e kryeministrit paralajmërojnë se opozita feston para kohe. Vetëm exit poll-i i Kanalit 14, televizion që konsiderohet zëdhënës i Netanjahut, e vendoste kryeministrin në pragun e fitores. Pak kush i besoi.

„Koalicioni i Netanjahut humbi 18 vende. Këtë do ta quaja përmbytje“, deklaroi Lian Pollak-David, deputete e ardhshme nga partia Jashar e Eisenkotit. Lideri i Demokratëve të majtë, Jair Golan, shkroi se „publiku e ndërroi qeverinë e Netanjahut“. Nga Likudi, ndërkaq, ish-ministri i Arsimit Joav Kisch u porositi të gjithë atyre që tashmë bëjnë plane t'i presin rezultatet përfundimtare.

Partitë arabe nga margjina në qendër

Një nga fituesit më të mëdhenj duhet të jetë partia arabe Ra'am, së cilës projeksionet i japin shtatë vende. Lideri i saj Mansour Abbas deklaroi se e kishin kontaktuar të dy blloqet. „Të gjithë flasin me ne, jo vetëm blloku i ndryshimeve“, tha Abbas, duke lënë të kuptohet se është i gatshëm të hyjë në një koalicion të udhëhequr nga Eisenkot. Megjithatë, pranoi se „për momentin nuk ka mjaftueshëm mandate për formimin e qeverisë“.

Një anketë e Qendrës aChord pranë Universitetit Hebraik tregoi se shumica e votuesve të bllokut opozitar duan që Eisenkot të formojë qeveri pikërisht me Ra'am. Partitë arabe tani janë gjuhëza e peshores. A do të guxojë qendra izraelite për një qeveri që varet prej tyre - dhe sa gjatë do të qëndronte një qeveri e tillë?

Çfarë pason

Beteja e vërtetë fillon pas numërimit. Pasi të numërohen të gjitha votat, që zakonisht zgjat disa ditë, presidenti Isaac Herzog zhvillon konsultime me çdo parti të zgjedhur dhe mandatin ia beson kandidatit me shanset më të mira për të mbledhur një koalicion të qëndrueshëm - jo domosdoshmërisht liderit të partisë më të madhe. Meqë Netanjahun nuk do ta propozojnë as opozita, as partitë arabe, shansin e parë ka gjasa ta marrë Eisenkot.

Ai do të kishte katër deri në gjashtë javë për të negociuar për poste ministrore, prioritete buxhetore dhe drejtime politike. Nëse nuk ia del, e duke pasur parasysh përvojën e tij modeste politike kjo është mundësi reale, mandati me shumë gjasë shkon te Netanjahu dhe gjithçka fillon nga e para. Nëse nuk ia del as ai, pasojnë zgjedhje të reja.

Kryeministri më jetëgjatë i Izraelit deri tani ka pasur rikthime të pabesueshme. Por këtë natë votuesit e lanë me partinë më të madhe dhe pa rrugë drejt pushtetit. E në Izrael, si edhe në Ballkan, numri i votave është vetëm hapi i parë - fitorja e vërtetë matet me atë se kush do ta formojë dhe do ta mbajë qeverinë.