Rebalanci i dytë këtë vit: 5,8 miliardë denarë më pak për investime kapitale, deficiti mbetet 4,1 për qind e BPV-së

Rebalanci i dytë i buxhetit gjatë këtij viti, dhe sërish logjika e vjetër: kur paratë nuk mjaftojnë, të parat priten investimet. Komisioni parlamentar për Financim dhe Buxhet e përfundoi pjesën e parë të debatit në leximin e dytë, ndërsa nga e mërkura vazhdon me amendamentet. Janë paraqitur gjithsej 124.

Shifrat i tha deputeti i VMRO-DPMNE-së, Brane Petrushevski. Të hyrat e përgjithshme ulen nga 379,5 në 374,2 miliardë denarë, shpenzimet nga 425,8 në 420,5 miliardë, që është rreth 5,3 miliardë denarë më pak në të dyja anët. Deficiti mbetet 46,3 miliardë denarë, gjegjësisht 4,1 për qind e BPV-së.

Nga priten paratë? Më së shumti te shpenzimet kapitale, të cilat ulen për rreth 5,8 miliardë denarë. Shpjegimi i pushtetit është se mjetet e planifikuara harmonizohen me „dinamikën reale të projekteve“ dhe me kohën që ka mbetur deri në fund të vitit. Në përkthim: projektet nuk ecin me ritmin me të cilin ishin planifikuar.

Opozita: „disfatë fiskale“

Deputetja e LSDM-së, Jovana Trençevska, e quajti rebalancin „pranim zyrtar të paaftësisë“. Ajo theksoi se të hyrat tatimore bien nga 213,2 në 209,7 miliardë denarë dhe se shkurtimi i shpenzimeve është bërë që deficiti të mos dalë mbi nivelin tashmë të lartë. Qeveria, sipas saj, si arsye përmend çrregullimet e zgjatura në tregjet e energjenteve.

Kovaçevski, nga ana e tij, paralajmëroi se shkurtimet i godasin sektorët nga të cilët varet drejtpërdrejt cilësia e jetës. „Qytetarët nuk e vlerësojnë sistemin shëndetësor sipas shumës që është shënuar në Buxhet. E vlerësojnë sipas asaj se sa gjatë presin për kontroll, nëse marrin diagnozë me kohë dhe nëse spitalet disponojnë me pajisjet e nevojshme“, tha ai, duke shtuar se ulja e investimeve në mjedisin jetësor i shtyn projektet për ajër më të pastër, ujë dhe menaxhim të mbeturinave.

Pushteti thotë se rebalanci nuk është pranim dështimi, por përgjigje ndaj rrethanave të ndryshuara, dhe se mbështetja për komunat vazhdon. Ndoshta. Por kur buxheti rimodelohet dy herë në vit, dhe edhe këtë herë më lehtë pritet ajo që duhet të ndërtohet, mbetet pyetja: sa nga investimet e premtuara do të mbeten vetëm në planin për vitin e ardhshëm?