Најмалку четири лица загинаа во катастрофалните поплави што го погодија источниот дел на Бугарија. Апокалиптични сцени, објавени на социјалните мрежи, прикажуваат како надојдената вода носи автомобили и дрвја, оставајќи зад себе урнатини и огромна инфраструктурна штета.

Најтешко погодено е подрачјето околу Бургас, каде што, според бугарските медиуми, меѓу загинатите има и руска државјанка.„Телото беше пронајдено во кал и урнатини што ги носеше силниот бран. Нашите екипи – противпожарна служба, полиција и жандармерија се распоредени низ погодените области за да обезбедат сигурност и помош“, изјави вишиот комесар Владимир Маринов.

Властите во Бугарија ги ангажираа сите расположливи ресурси, вклучително и воен персонал и транспортниот баталјон од Командата за логистика во Бургас. Тие работат на расчистување на инфраструктурата и обезбедување пристап до јавните објекти во најпогодените населби, меѓу кои и туристичката зона Елените.

Претседателот на Бугарија, Румен Радев, соопшти дека добил понуда за помош од Република Македонија, по телефонскиот разговор со претседателката Гордана Сиљановска Давкова.

„Изразувам благодарност до претседателката Сиљановска Давкова за сочувството и подготвеноста на Македонија да помогне во справувањето со последиците“, изјави Радев.

Иако ситуацијата полека се стабилизира, метеоролозите предупредуваат на нови врнежи и можно зголемување на водостојот во наредните денови.