Седумдесет дена блокади. Толку издржаа активистите на Кожуф лани, за да ја одбранат реката Дошница од двете мали хидроцентрали „Баров Дол“ и „Папрад“. Во септември фирмата ја повлече целата механизација. Сега активистите од „Зелена народна стража“ алармираат дека Владата донела одлука со која се продолжуваат роковите за изградба – и дека повторно се подготвува внесување на механизација, со обезбедување.

„Додека многу држави ги отстрануваат малите хидроцентрали поради штетните последици врз природата, кај нас повторно се прават обиди да се уништи реката Дошница. По 70 дена блокади и јасен став дека никој тука не сака мали хидроцентрали, некој повторно се обидува да ја погази волјата на народот“, велат од Иницијативата.

Истата недела кога државата демонтираше хидроцентрали на Шар Планина

Реакцијата на активистите доаѓа само неколку дена по почетокот на демонтирањето на две недовршени мини-хидроцентрали на реката Пена. Тие проекти беа стопирани поради локацијата во заштитеното подрачје на Националниот парк „Шар Планина“.

Разликата меѓу двата случаја е една единствена административна одлука: Шар Планина има статус на национален парк. Кожуф го нема. Активистите тоа прашање го отвораат со години – зошто планината сè уште чека статус, кога нејзиното природно богатство е причината зошто воопшто некој сака да гради таму.

Хартијата што ја нема

Од Левица соопштија дека добиле неофицијални информации за продолжените рокови и дека нивните советници во Општина Кавадарци поднеле советничко прашање со кое бараат целосен увид во документацијата. Списокот што го бараат вреди да се прочита: барања за одобрение за градење, основни проекти и нивни ревизии, договори за концесија, геодетски елаборати, докази за платени надоместоци и административни такси, издадени одобренија за градење.

Тоа не е список на партија што сака да блокира проект. Тоа е список на нешта што во нормална процедура треба веќе да бидат јавни. Активистите го поставуваат истото барање со свои зборови: „Секој документ поврзан со овој договор треба да биде јавен. Секој состанок со инвеститори треба да биде документиран и објавен.“

Концесиите за хидроцентрали на македонските реки се доделени пред повеќе од десет години. Од нив десет години не произлезе ниту еден исклучен проект по сопствена волја на институциите – само проекти стопирани откако луѓето излегле на терен. Дошница е сега трет ваков случај по Пена.

„Луѓе од цела Македонија стоеја сложно на блокадите и еднаш ја одбранија Дошница. Ќе ја одбраниме пак“, порачаа активистите. Ако тоа е единствената функционална форма на еколошка заштита во земјава, тогаш прашањето за надлежните институции е сосема просто: за што точно се плаќаат?