Албанскиот премиер Еди Рама го кажа она што во Брисел ретко се изговара на глас. „Погледнете ја Украина. Она што ѝ се ветува е лага. По редовниот пат на пристапување, со исполнување на сите критериуми, никогаш нема да биде примена. Тоа сите го знаат“, изјави Рама во интервју за германскиот „Велт ам зонтаг“.

Рама не рече дека Украина не треба да стане членка. Неговата порака е друга: сегашниот модел на преговори, со десетици поглавја, услови и можност секоја членка поединечно да го блокира целиот процес, според него не е реален пат за Киев. Затоа предлага Украина уште сега да седне на европската маса, а полното членство да дојде подоцна, преку процес заснован на конкретни резултати.

Кол не им понуди 33 поглавја

За да ја објасни поентата, Рама се врати во 1989 година, кај тогашниот германски канцелар Хелмут Кол. „Кога падна ѕидот, Кол не им рече на источните Германци: сега имате 33 преговарачки поглавја, па потоа ќе ве примиме. Рече: сите сме во ист чамец“, изјави тој. Според него, токму таа способност, брзи и стратешки одлуки во големи геополитички моменти, ѝ недостасува на денешна Европа.

Оттука и неговиот најрадикален предлог: укинување на правото на вето. Со сегашните правила, предупредува Рама, секоја нова членка добива можност со вето да ја блокира целата Унија, а проширувањето уште повеќе го отежнува одлучувањето. „Ако Европа треба да се натпреварува со Кина, САД и Индија, апсурдно е една држава членка да може да блокира сè“, рече тој.

Звучи познато?

Во Скопје оваа реченица не треба да се преведува. Македонија со години ги гледа своите европски преговори како заложник на вета од соседите, прво грчкото, потоа бугарското. Рама сега истото го вели за Украина, од позиција на лидер чија земја и самата со години чека во истиот бавен ред. Дали Брисел полесно слуша кога критиката доаѓа од Тирана отколку кога доаѓаше од Скопје?

ЕУ како „Титаник“

Рама отиде и подалеку и ја спореди Унијата со „Титаник“ што плови кон санта мраз. „Сантата веќе ја идентификуваше големиот Европеец Марио Драги. ЕУ е помалку иновативна и конкурентна од другите големи играчи и ѝ недостасува способност за храбри и стратешки одлуки. Ако ништо не се промени, ќе се претвори во Титаник“, изјави тој.

И покрај сета критика, Рама останува гласен застапник на членството на Албанија и тврди дека неговата земја нема алтернатива на европската интеграција. Неговиот удар е насочен кон системот, кој според него повеќе не може истовремено да прима нови членки и брзо да одлучува. Ќе го демантира ли Брисел со дела, или со уште еден самит со заедничка изјава?