Камениот мост и плоштадот „Македонија“ деновиве темелно се чистат. Градските екипи ги отстрануваат натписите, графитите и насобраната нечистотија со хемиско средство за отстранување боја и спрејови, а потоа површините се мијат под висок притисок, долж целиот мост и на плоштадот.

Паралелно, во завршна фаза е новото архитектонско осветлување на мостот, кое треба да го осветли неговиот профил над коритото на Вардар. Повторно во употреба треба да се пушти и подната фонтана на плоштадот, која со години стоеше исклучена поради технички дефекти и, според Градот, била оставена да пропаѓа.

„Плоштадот „Македонија“ и Камениот мост се лицето на нашиот град“, напиша градоначалникот Орце Ѓорѓиевски, додавајќи дека токму оттука многу туристи ја понесуваат својата прва слика за Скопје.

Чист мост е добредојдена промена. Но долгогодишните натписи не се појавија за една ноќ, ниту ќе исчезнат засекогаш со едно миење. Дали по фотографиите од чистењето ќе следува и редовно одржување, или ќе ја чекаме следната генералка за повторно да ја видиме фонтаната сува?