Microsoft го лови програмерот со Mac: Surface Laptop Ultra со чип од Nvidia чини до 5.900 долари, а за стар MacBook Pro нуди попуст до 1.000 долари

Во јуни Nvidia објави дека склучила договори со Microsoft и со низа други производители за Windows компјутери „подготвени за ВИ и агенти“, изградени на нејзиниот чип RTX Spark. Детали тогаш немаше. Сега ги има – заедно со цените. На настан во Сан Франциско, Microsoft го претстави Surface Laptop Ultra: основниот модел почнува од 2.600 долари (околу 2.240 евра), посилната верзија од 3.700 долари (околу 3.180 евра), а со повеќе меморија и простор цената оди до 5.900 долари (околу 5.070 евра). Најскапата конфигурација, според компанијата, веќе е распродадена.

До лаптопот стои и работната станица Surface RTX Spark Dev Box, од 6.000 долари (околу 5.160 евра), со веќе вградени алатки на Microsoft за програмери: VS Code, GitHub Copilot CLI, WSL и PowerShell 7. Ветувањето за двете машини е исто – ВИ-моделите да работат локално, на самиот уред, и бесплатно, благодарение на процесорот, графиката, заедничката меморија и подобреното ладење. Бесплатно, откако ќе платиш неколку илјади долари за хардверот.

Поважната вест за обичниот корисник не е лаптопот, туку софтверот. Машините работат на преработен Windows 11 со функција наречена Execution Containers, која ВИ-агентите ги затвора во изолирана средина. Таа ќе стигне до сите корисници на Windows 11, рече извршниот директор Сатја Надела. „Една од работите што ги сфативме во последните три-четири години е дека самиот модел не прави многу. Навистина треба да оркестрираш и да имаш меморија надвор од моделот“, објасни тој, додавајќи дека Microsoft го овозможува тоа „не само за нашите апликации, туку за агентот на кој било. За тоа ќе служи платформата Windows отсега.“

Кого лови Microsoft, не крие. На секој што ќе предаде MacBook Pro, компанијата му нуди попуст до 1.000 долари (околу 860 евра), затоа што Mac стана омилена машина на програмерите и на ентузијастите за ВИ-агенти, особено во Силикон Вали. За секој случај, Microsoft ветува дека машините со толку силна графика ќе бидат добри и за видео, создавање содржини и игри. Паралелно, и Dell ги објави деталите за својот XPS 16 Creator Edition со чипот RTX Spark, кој може да се нарача однапред за 3.800 долари, со испорака кон крајот на октомври.

Ова не се лаптопи за канцеларијата во општина. Тоа се машини за луѓе што сакаат ВИ-агентите да им работат на сопствен хардвер, а не во туѓ облак. Но пораката е подолга од спецификацијата: војната меѓу Microsoft и Apple повеќе не е за тоа чиј оперативен систем изгледа подобро, туку на чиј компјутер ќе живеат агентите. А за тоа Microsoft е подготвен да ти плати за стариот Mac.