Русија агресивно ја промовира својата апликација Макс, социјална мрежа без енкрипција, додека истовремено ги блокира ВатсАп и Телеграм – двете најпопуларни апликации меѓу корисниците во земјата.

„Воопшто нема сообраќај на ВатсАп. Практично не постои. ВатсАп е мртов, Телеграм умира. Во меѓувреме, сообраќајот на Макс рапидно расте“, изјави директорот на рускиот телекомуникациски оператор Ростелеком, Михаил Осејевски, на конгресот на Рускиот сојуз на индустријалци.

Воведувањето на Макс предизвика загриженост меѓу критичарите и организациите за дигитални права, кои предупредуваат дека Москва би можела да ја користи апликацијата за надзор на граѓаните. „Сите податоци кои минуваат преку оваа апликација може да се сметаат за достапни за нејзиниот сопственик, во овој случај руската држава”, рече експертот за сајбер безбедност Батист Робер.

Апликацијата беше лансирана во 2025 година од рускиот технолошки гигант ВК и често се споредува со кинескиот ВиЧат бидејќи комбинира социјална мрежа и комуникациска платформа со пристап до државни услуги, дигитална идентификација и банкарство.

Иако не е официјално задолжителна, властите јасно сигнализираат дека животот без Макс ќе биде сe потежок. Претседателот Владимир Путин ја промовира како побезбедна платформа која ги исполнува барањата за „технолошки суверенитет” на земјата.