Во Апелациониот суд во Тирана денеска се случи крвав инцидент кога судијата Астрит Калаја беше смртно застрелан додека ја извршуваше својата должност.

Напаѓачот Ѓан Шкемби испукал три куршуми кон судијата во моментот кога Калаја почнал да ја чита пресудата во неговиот случај. Судијата бил веднаш пренесен во клиниката за трауматологија во Тирана, но подлегнал на повредите.

Во нападот биле повредени уште две лица – татко и син, кои се надвор од животна опасност.

Според албанските медиуми, Калаја водел предмет за сопственост на поранешна училишна зграда во Скадар, во која живееле 31 семејство. Тие тужеле дека Шкемби со фалсификувани документи се стекнал со правото на сопственост и ги присилувал да го напуштат објектот.

Истражителите сега испитуваат како напаѓачот успеал да внесе оружје во судот, минувајќи низ безбедносни проверки и метал детектори.

Трагедијата предизвика шок и револт во јавноста, со барања за итно зголемување на безбедноста во албанските судови.