Американските разузнавачки служби предупредуваат дека Западен Балкан останува ранлив на руско влијание и обиди за дестабилизација, според извештајот „Проценка на заканите за 2026″ објавен на 18 март.

Документот го опишува Западен Балкан како простор каде интересите на големите сили продолжуваат да се судираат, а нерешените политички и етнички поделби создаваат плодна почва за надворешно влијание.

Москва е директно посочена како фактор кој ја потхранува нестабилноста меѓу Србија и Косово и поддржува сепаратизмот на Република Српска од Босна и Херцеговина.

Извештајот предупредува на политичко влијание, дезинформации, сајбер-ризици и обиди за поткопување на европската безбедносна архитектура. Регионот е посебно нагласен како особено ранлив.

Проценката рефлектира пошироко американско гледиште дека конфликтот во Украина ги продлабочил поделбите меѓу Западот и Москва, со последици што се простираат далеку од источниот фронт.