Скопје во недела им припадна на тркачите. На 22. издание на Виз Ер Скопскиот маратон учествуваа над 15.000 натпреварувачи од 63 земји, што организаторите го најавија како рекорден број. Стартот го означија министерот за спорт Борко Ристовски и градоначалникот Орце Ѓорѓиевски, а маратонците, полумаратонците и штафетите тргнаа од улицата „Димитрие Чуповски“ кај Рекорд, со цел на плоштадот „Македонија“.

На маратонската трка победи Кениецот Дерик Чеге Њороге со време од 2:12:56 часа, пред својот сонародник Едвин Кимару Косгеи, кој заостана помалку од половина минута. Најдобриот македонски маратонец Дарио Ивановски, победник на минатогодишниот маратон, го освои третото место со 2:13:49 – помалку од минута зад победникот. Осмото место на Жан Тошев, вториот најдобар македонски учесник, е исто така резултат за бележење.

Во женска конкуренција победи Долфин Кемунто Нијагака, пред своите сонароднички Кипкемои и Какури. Кенијците доминираа и на полумаратонот, каде победи Кенеди Роно, а најдобриот македонски претставник Муџахид Мислими беше четврти. На трката од пет километри победија Андреј Арсов и Ирма Хајдари.

Покрај резултатите, маратонот имаше и свој шоу-дел. Најголемо внимание привлече Христијан Проданов, кој веќе неколку години по ред трча во костими на суперхерои – од Капетан Америка до Бетмен. Годинава истрча облечен како Александар Македонски.

„Скопскиот маратон е голем спортски настан што ги става Скопје и Македонија на светската спортска мапа“, рече министерот Ристовски. Тоа е точно за едно неделно претпладне, кога дел од улиците од 6 до 14 часот беа затворени за автомобили и отворени за луѓе. Скопје тој ден покажа како изгледа град во кој се трча, а не се стои во колона. Можеби вреди да се запамети и по маратонот.