Vjedhja më e madhe kripto në histori: 6,3 miliardë dollarë nga Binance, ndërsa gjurmët të çojnë në Pjongjang

E enjte në mbrëmje, njëzet minuta. Kaq iu desh sulmuesve për të nxjerrë pjesën më të madhe të 6,3 miliardë dollarëve nga Binance, bursa më e madhe e kriptovalutave në botë. Kjo është katër herë më shumë se rekordi i deritanishëm: 1,5 miliardë dollarë nga bursa Bybit në shkurt 2025.

Firma amerikane TRM Labs vlerëson se nga portofolet digjitale të Binance, në dhjetë rrjete të ndryshme blockchain, janë transferuar afërsisht 6,36 miliardë dollarë. Përgatitjet zgjatën së paku 36 orë: fillimisht disa transaksione të vogla provë, për të parë nëse gjithçka funksionon, pastaj goditja kryesore. Sulmuesit morën kontrollin e infrastrukturës që miraton transferet dhe vetë i lëshonin vetes urdhra. Imagjinoni një grabitje ku hajduti nuk e thyen kasafortën, por i urdhëron bankës që vetë t'ia nxjerrë paratë.

Binance fillimisht njoftoi se ndërhyrja ka gjasa të ketë nisur nga laptopi i komprometuar i një inxhinieri. Hetimi i mëvonshëm zbuloi edhe pika të tjera hyrjeje. Kompania pretendon se për momentin nuk ka prova për vjedhjen e çelësave privatë dhe premton se të gjitha humbjet do t'i mbulojë nga fondi rezervë dhe nga mjetet e veta. „Mjetet e përdoruesve janë të sigurta“, thuhej në njoftim. Aty thuhej edhe se depozitat dhe tërheqjet janë ndërprerë përkohësisht. Paratë i ke të sigurta, vetëm se për momentin nuk mund t'i tërheqësh.

Pse të gjithë shikojnë nga Pjongjangu

TRM Labs „me siguri të lartë“ ia atribuon sulmin grupit të hakerëve TraderTraitor, të lidhur me regjimin e Koresë së Veriut. TraderTraitor lidhet edhe me vjedhjen nga Bybit, të cilën FBI atëherë zyrtarisht ia atribuoi Koresë së Veriut. Chainalysis zbuloi se një pjesë e parave filluan të përzihen me mjete nga sulmi i mëparshëm ndaj bursës Bitget, gjithashtu i atribuuar hakerëve verikoreanë, ndërsa Elliptic konfirmoi se një pjesë e të vjedhurave përfundoi në një adresë që tashmë ishte e lidhur me atë sulm.

Zyrtarisht, atë emër ende askush nuk e ka thënë. As autoritetet amerikane as Binance nuk e kanë konfirmuar identitetin e sulmuesve. Kompania thotë vetëm se bashkëpunon me organet hetuese, mes tyre FBI-në dhe Shërbimin Sekret amerikan.

Pse është e rëndësishme? Sipas hetuesve amerikanë dhe ndërkombëtarë, vjedhje të tilla janë një nga burimet e parave për regjimin e Kim Jong Un, përfshirë programet e tij ushtarake dhe bërthamore. Një shtet nën sanksione të gjera ndërkombëtare, i shkëputur nga sistemi normal bankar, gjeti një sportel ku askush nuk kërkon letërnjoftim. Tom Robinson, bashkëthemelues i Elliptic, deklaroi se nëse konfirmohet përgjegjësia e Koresë së Veriut, vetëm kjo vjedhje pothuajse do ta dyfishonte vlerën totale të kriptovalutave që regjimi ka vjedhur deri tani.

U shpëtua ajo që ka pronar

Binance dhe partnerët ngrinë shpejt rreth tre miliardë dollarë, kryesisht në kriptovaluta të qëndrueshme, emetuesit e të cilave mund të bllokojnë transaksione. Tether njoftoi se ka bllokuar rreth 1,6 miliardë dollarë në USDT, ndërsa Circle më shumë se 800 milionë në USDC. Pjesa tjetër është histori tjetër. Elliptic vlerëson se rreth 3,3 miliardë dollarë mbetën jashtë mundësisë së masave të tilla, kryesisht në bitcoin, ether dhe kriptovaluta të tjera ku nuk ekziston organ qendror që mund të shtypë ndalesën. Sulmuesit përdorin mijëra transaksione të automatizuara për të fshirë gjurmët, ndërsa Chainalysis flet për modele të pashembullta të fshehjes së parave.

Këtu qëndron ironia e gjithë kësaj pune. Kriptovalutat me vite u shitën si para pa pronar. Kur erdhi vjedhja më e madhe në historinë e tyre, u shpëtua pikërisht ajo që ka pronar me buton bllokimi. Ajo që nuk ka pronar iku.

Çmimi i bitcoin-it ra për më shumë se 4 për qind, goditje morën edhe Ethereum dhe Solana. Binance ka më shumë se 300 milionë përdorues të regjistruar në mbarë botën dhe në vitin 2024 raportoi më shumë se 160 miliardë dollarë pasuri të klientëve në ruajtje. Analistë të pavarur paralajmëronin për transaksione të dyshimta orë të tëra para se kompania ta pranonte publikisht se ka problem.

Hetuesit tani po ndjekin paratë nëpër mijëra transaksione, dhe sa do të kthehen askush nuk guxon ta thotë. Kushdo që mban kursime në një aplikacion të tillë ka një pyetje më të thjeshtë: kur të vijë e enjtja tjetër në mbrëmje, kush do të ta kthejë telefonin?