I dënuar me 16 vjet për terrorizëm dhe vepra të rënda, u arrestua vetëm kur vetë u kthye në Bllacë

Dy dënime me burg nga tetë vjet, dy fletarresti qendrore dhe ndërkombëtare - dhe njeriu vetë u kthye në shtet, nga dera kryesore. Në vendkalimin kufitar Bllacë e Poshtme, gjatë hyrjes në Maqedoni, policia më 15 tetor e privoi nga liria 43-vjeçarin F.T. nga fshati shkupjan Kondovë.

Fletarrestet i lëshoi Gjykata Themelore Penale Shkup. Njëri dënim prej tetë vjetësh është për „vepra të rënda kundër sigurisë së përgjithshme“ sipas nenit 288, paragrafi 3 i Kodit Penal, ndërsa tjetri, po aq i gjatë, për „terrorizëm“ sipas nenit 313. Gjithsej gjashtëmbëdhjetë vjet burg që prisnin të vuheshin.

MPB njoftoi vetëm se personi do t'i dorëzohet institucionit përkatës ndëshkues-përmirësues. Asgjë më shumë: as sa kohë ishte jashtë vendit, as ku fshihej, as kur janë shqiptuar aktgjykimet.

Arrestimi është sukses dhe këtë askush nuk e kontestion. Por pyetja që mbetet është më e thjeshtë se çdo kumtesë: si përfundoi jashtë vendit, në vend se në burg, një njeri me dy dënime për terrorizëm dhe vepra të rënda kundër sigurisë së përgjithshme - dhe sa persona të tillë „të kërkuar“ shëtisin ende të lirë derisa dikush t'i njohë në kufi?