Autokomanda një hap më afër parkimit me zona: tre milionë denarë për tabela, ndërsa për çmimin dhe rregullat për banorët - asnjë fjalë

Në Autokomandë parkimi ka dalë aq jashtë kontrollit sa banorët e një ndërtese vendosën vetë një barrierë në parkingun para saj. Tani edhe institucionet bënë një hap: Këshilli i Komunës së Gazi Babës miratoi vendimin për bashkëpunim ndërkomunal me Qytetin e Shkupit për sinjalizim rrugor dhe pajisje për qetësimin e trafikut në lagje, pasi këtë bashkëpunim ndërkomunal e kishte votuar më parë edhe Këshilli i Qytetit.

Kryetari Boban Stefkovski thotë se me këtë vendim „po i afrohemi futjes së parkimit me zona në lagje“. Ndërhyrja do të kushtojë rreth tre milionë denarë dhe do të financohet tërësisht nga Qyteti i Shkupit. Tabelat dhe lyerjen e rrugëve do t'i bëjë NP „Rrugët dhe udhët“, ndërsa Komuna do të japë Projektin bazë të trafikut të rishikuar për ndryshimin e regjimit të qarkullimit.

Nga Komuna flasin për „përdorim më racional të vendeve të lira të parkimit“ dhe „hapësirë publike më të rregulluar“. Gjithçka bukur. Por në asnjë njoftim nuk ka datë kur fillon pagesa, sa do të kushtojë ora, cili do të jetë orari, as - gjëja më e rëndësishme për njerëzit që jetojnë aty - me çfarë kushtesh do të parkojnë banorët para ndërtesës së tyre.

Parkimi me zona mund ta zgjidhë çmendinë në Autokomandë. Mund edhe vetëm ta faturojë. Dallimin do ta bëjnë pikërisht ato detaje që deri tani askush nuk i thotë, dhe banorët me të drejtë do t'i kërkojnë para gjobës së parë, jo pas saj.