„E di se s'di asgjë" - një mendim që tradicionalisht i atribuohet Sokratit dhe që simbolizon urtësinë, thjeshtësinë dhe vetëdijen se gjithmonë ka diçka për të mësuar.

Vetëm te politikanët tanë, me sa duket, një dilemë e tillë nuk ekziston. Për ta, gati gjithçka është e njohur paraprakisht, çdo vendim është „më i miri", çdo politikë është „e pagabueshme", ndërsa kritika më së shpeshti përjetohet si sulm, në vend të një mundësie për përmirësim.

Sikur të kishin qoftë edhe pak nga thjeshtësia e Sokratit, ndoshta do t'i dëgjonin më shpesh qytetarët, e më rrallë do të bindnin veten se kanë gjithmonë të drejtë.

Urtësia e vërtetë nuk është të mendosh se di gjithçka, por të jesh i vetëdijshëm se gjithmonë ka diçka për të mësuar.

Urtësia është të dish se çdo njeri është më i zoti në fushën e vet. Mjeku në mjekësi, inxhinieri në teknikë, mësuesi në arsim, bujku në arë, sipërmarrësi në biznes, shkencëtari në kërkim...

Asnjë njeri nuk mund të jetë ekspert i lartë për gjithçka. Prandaj urtësia më e madhe nuk është t'i kesh të gjitha përgjigjet, por t'i dëgjosh ata që vërtet dinë.

Vetëm kështu merren vendime të mira. Gjithçka tjetër është vetëbesim pa mbulesë.