Kievi natën e tretë në errësirë, Moska me aeroporte të mbyllura: lufta godet përditshmërinë

Në disa pjesë të Kievit familjet marrin rrymë nga një orë, e pastaj sërish errësirë. Kjo është tashmë nata e tretë radhazi. Në pamjet nga kryeqyteti ukrainas shihen rrugë të errëta dhe kryqëzime ku ndriçojnë vetëm semaforët. Natën mes 8 dhe 9 tetorit forcat ruse kryen një sulm të kombinuar me raketa lundruese dhe balistike dhe me dronë „Geran“ mbi disa rajone të Ukrainës - ndërsa shkyçjet e reja erdhën para se të riparoheshin dëmet nga goditjet e mëparshme.

Sulme u raportuan në Ivano-Frankivsk dhe rrethinë, si dhe në rajonet e Dnipropetrovskut, Rivnes, Ternopilit, Vinicës, Kievit, Poltavës, Volinisë, Zhitomirit dhe Odesës. Në Çernihiv, sipas burimeve lokale, kumbuan shpërthime të fuqishme pas goditjes së dy dronëve. Veçanërisht dallohet sulmi mbi termocentralin TEC-5 të Harkivit, i cili kohët e fundit kishte rifilluar punën: sipas kanaleve lokale, u godit me bomba avioni. Disa burime pohojnë se impianti është shkatërruar plotësisht, por shtrirja e dëmit nuk është konfirmuar zyrtarisht.

Kur nuk ka rrymë, nuk ka as ujë

Shkyçja nuk do të thotë vetëm një dhomë ndenjeje e errët. Pa rrymë ndalen stacionet e pompimit që e mbajnë presionin në ujësjellës, kështu që banorët e kateve të larta mbeten pa ujë. Ndërprerjet më të gjata i rrezikojnë pompat e kanalizimit dhe ngrohtoret, ndërsa spitalet nuk mund të mbështeten pafundësisht në agregatët rezervë. TEC-5 i Harkivit është burim i rëndësishëm i rrymës dhe ngrohjes për qytetin - dhe nëse nuk riparohet para sezonit të ngrohjes, dimri atje do të fillojë shumë më herët se kalendari.

Autoritetet e Kievit thonë se kanë përgatitur rreth 1.120 gjeneratorë për spitale dhe institucione sociale, 69 kaldaja mobile dhe afërsisht 1.300 pika ku qytetarët mund të ngrohen, të mbushin telefonin dhe të marrin ndihmë bazë. Për ndërtesat e banimit janë siguruar edhe rreth 4.500 pajisje - gjeneratorë, bateri dhe invertorë. Tingëllon shumë, derisa të krahasohet me një qytet me miliona banorë. Kryetari Vitali Kliçko qysh më herët paralajmëroi për një krizë të mundshme serioze komunale dhe u rekomandoi atyre që munden që gjatë ndërprerjeve të gjata të mendojnë për largim të përkohshëm nga kryeqyteti.

Natë në aeroportet e Moskës

Më 9 tetor luftën e ndien edhe moskovitët, vetëm në një mënyrë tjetër. Kryetari Sergej Sobjanin njoftoi se mbrojtja kundërajrore kapi 15 dronë që fluturonin drejt kryeqytetit rus, ndërsa mediat ruse raportuan shpërthime të forta në pjesët jugore të qytetit. Sipas agjencisë azerbajxhanase APA, për 24 orë në aeroportet e Moskës pati më shumë se 370 vonesa dhe 62 fluturime të anuluara - më së shumti në Vnukovo dhe Sheremetjevo. Aeroportet Vnukovo, Zhukovski dhe Domodedovo natën ishin të mbyllura gjashtë deri në shtatë orë, ndërsa puna e rregullt u rikthye rreth orës 7 të mëngjesit. Në rrjete qarkullojnë pretendime se edhe Vladimir Putin pati problem të kthehej në Moskë nga samiti i KSHP-së në Turkmenistan - këtë deri tani nuk e ka konfirmuar askush.

Në perëndim, Polonia natën ngriti aviacionin ushtarak për shkak të sulmeve ruse pranë kufirit me NATO-n dhe i vendosi sistemet e mbrojtjes kundërajrore në shkallën më të lartë të gatishmërisë. Dallimi mes dy kryeqyteteve është në atë që numërohet: në Moskë fluturimet e anuluara, në Kiev orët me rrymë. Ballkani e mban mend mirë si duket dimri në një qytet pa rrymë dhe ujë, me qirinj dhe kova nëpër shkallë. Sa net mund të durojë një qytet para se „largimi i përkohshëm“ të bëhet plani i vetëm?