Thuajse një milion njerëz humbën gjithsej 3,8 miliardë dollarë pasi blenë mem-tokenin $TRUMP të presidentit amerikan Donald Trump. Shifra vjen nga firma kripto-analitike Nansen, e cila studioi transaksionet publikisht të dukshme në blockchain deri në fund të qershorit. Tregimi në një fjali: dy nga çdo tre persona që blenë - humbën.

E kush fitoi? Pikërisht ai emri i të cilit është në token. Trump nxori rreth 636 milionë dollarë nga $TRUMP - thuajse gjysmën e fitimit të tij të përgjithshëm kripto prej 1,4 miliardë dollarësh vitin e kaluar. Tokeni, i lëshuar tri ditë para inaugurimit të tij në vitin 2025, tani vlen 1,69 dollarë - rënie prej 98 për qind nga kulmi prej 75,35 dollarësh. Ata që hynë në kulm panë si paratë e tyre avullonin thuajse në zero.

Kjo s'është fatkeqësi e rastësishme e tregut, por strukturë. Nën administratën e Trumpit, komisioni amerikan i letrave me vlerë (SEC) njoftoi se s'do t'i rregullojë mem-tokenët si letra me vlerë dhe tërhoqi disa padi kundër kompanive kripto. Një zëdhënës i Shtëpisë së Bardhë u mburr se administrata e bëri SHBA-në „kryeqytetin kripto të botës“. Kur ai që i shkruan rregullat është i njëjti që përfiton nga loja, fjala „rregullore“ bëhet shaka.

Mësimi është aq i vjetër sa vetë kumari. Kur dikush të shet një premtim se do të pasurohesh brenda natës, pyet veten kush fiton në të vërtetë nga çdo iluzion i shitur. Mem-tokenët s'kanë produkt, s'kanë të ardhura, s'kanë asgjë përveç një emri dhe shprese - dhe shpresa, siç tregojnë këto 3,8 miliardë, është malli më i shtrenjtë në treg. Në Ballkan i njohim këto tregime; ndryshojnë vetëm emrat e piramidave.