Komuna Qendër, në bashkëpunim me shoqatën e pensionistëve, organizon këtë mbrëmje ngjarjen me titull „Nostalgji për korzon - kujtim për një kohë të bukur". Mbrëmja nis në orën 19:00 me një shëtitje simbolike nëpër qendrën historike të Shkupit - nga Sheshi Maqedonia, pranë Pallatit të Ristiqit, ish-hotelit „Makedonia" dhe lokaleve legjendarë Kenan, Vanila dhe Grombi.

Kryetari i komunës, Goran Gerasimovski, fton banorët të ndjejnë „sharmin e shëtitjeve dikur nëpër qendrën e Shkupit". Ai e përshkruan korzon si „vendi ku lindnin simpatitë dhe dashuritë e para" dhe shton një mendim që do ta kuptojë kushdo që ka kaluar të dyzetat - „një vështrim vlente më shumë se një mijë mesazhe në celular".

Programi vazhdon në sallën e ShF „Dimitar Miladinov" me valle të mbrëmjes - DJ-i do të luajë „evergrin" për të ngjallur kujtimet dhe emocionet e Shkupit të vjetër. Komisioni i pensionistëve i Komunës Qendër ka dërguar ftesa edhe për pensionistë nga komuna të tjera. Që do të thotë se ngjarja synon të jetë diçka më shumë se një nismë komunale - synon të jetë përvojë e përbashkët për të gjithë ata që mbajnë mend Shkupin para 1963-shit.

Pas nostalgjisë qëndron një histori më e madhe. Shkupi nuk i ka më lokalet e epokës kur njerëzit shëtisnin çdo mbrëmje nëpër rrugët qendrore si ritual i përditshëm. Transformimet urbanistike, ndërrimi i godinave të vjetra me të reja dhe ndryshimi i mënyrës së jetesës e kanë fshirë praktikisht korzon e viteve '60. Ajo që po bën sot Komuna Qendër nuk është thjesht argëtim për pensionistë - është një pranim i vogël se një pjesë e Shkupit ka qenë më e mirë se Shkupi që kemi sot. Dhe një pranim i tillë është gjë e rrallë nga një nismë politike.