Qeveria refuzoi propozimin e Venko Filipçes, lider i LSDM, për një referendum ku qytetarët do të vendosnin për ndryshimet kushtetuese dhe rrugën e integrimit evropian. Mesazhi i shkurtër i qeverisë: "Nuk do të shpenzojmë as kohë, as para". Argumenti: Agjenda reformuese ka treguar orientim evropian, dhe të gjitha "mjetet në dispozicion" për momentin shkojnë për projekte konkrete, jo për ushtrime politike.

Propozimi i Filipçes erdhi në një kontekst specifik. LSDM nga opozita kërkon përfshirjen sërish të qytetarëve në vendimet për ndryshimet kushtetuese të lidhura me pakicën bullgare - një amendament që qeveria e Hristijan Mickoskit dhe VLEN-it formalisht e shtyn, por në thelb e bllokon. Me propozimin për referendum, Filipçe vendoste qeverinë në dilemë: ose ta pranojë (dhe të rrezikojë humbjen), ose ta refuzojë (dhe të akuzohet se shmang vendimin qytetar).

Qeveria zgjodhi të dytën - me kujtesë për 30 shtatorin 2018, kur LSDM organizoi referendumin për ndryshimet kushtetuese për emrin "Maqedonia e Veriut", që nuk kaloi pragun e daljes dhe la një kontest ligjor të hapur. Argumenti i qeverisë: "Pamë se si LSDM e mendon plebishitin pa garanci". Përkthim: nëse nuk ja dolët atëherë kur ishit në pushtet, pse të provojmë tani?

Për qytetarët, pyetja është e thjeshtë. A do të miratohen ndryshimet kushtetuese të lidhura me pakicën bullgare pa vendimin e tyre të drejtpërdrejtë? Sipas skenarit aktual politik, përgjigja është "ndoshta po". Kjo nënkupton një raund të ri tensioni politik në muajt e ardhshëm - me LSDM në opozitë që do të përdorë çështjen për delegjitimimin e qeverisë, dhe VMRO-DPMNE që do të zgjasë një vendim që edhe vetë e dinë se do të jetë jopopullor. Lojë klasike politike. Me qytetarët si stacioni i fundit i vendimeve.