Spotify po shton edhe një buton IA. Këtë herë është një asistent bisedues - diçka si ChatGPT, i integruar drejtpërdrejt në aplikacion, me të cilin përdoruesit mund të bisedojnë për të gjetur muzikë, podkaste ose audiolibra. Shkruan ose flet, kurse asistenti përgjigjet, sugjeron, mban mend çfarë ke dëgjuar dhe të thotë kur doli ndonjë album ose nga çfarë u frymëzua.

Funksioni për momentin është në fazë beta, vetëm për abonentët Premium, në iOS dhe Android, dhe vetëm në tri vende - SHBA, Irlandë dhe Suedi - për përdoruesit mbi 18 vjeç që komunikojnë në anglisht. Maqedonia, si zakonisht, pret. Teknologjia, thonë, kombinon sistemet e vetë Spotify me modele nga disa furnizues të jashtëm, të zgjedhur sipas detyrës.

Nuk është hera e parë që Spotify shtyn inteligjencën artificiale në veshët e dëgjuesve. Më parë erdhi një DJ IA që flet me zë, pastaj një mjet për ndërtimin e listave të këngëve përmes kërkesave me tekst. Secili prej tyre u shpall si hap përpara. Secili prej tyre, në fakt, bën një e të njëjtën gjë: të mban në aplikacion më gjatë dhe mbledh më shumë të dhëna për atë çfarë do.

Pyetja për dëgjuesin është e thjeshtë. A të duhet vërtet një bisedë me një aplikacion për të gjetur një këngë - apo thjesht do të shtypësh play? Dikur shitësi në dyqanin e pllakave të rekomandonte një pllakë sepse të njihte. Tani algoritmi të rekomandon sepse të mat. Dallimi nuk është i vogël, thjesht është fshehur mirë pas tonit miqësor.